La poesia "I nostri platan" è tratta dal libro "Mezzo secolo di storia di Parabiago nelle cartoline d'epoca (1900-1950)" di M. Giudici e P. Sperandio.

I nostar platan inscì bei! Che boria,
Se un quei forestu al steva lì a guardaghi!
Che voeuia da cuntaghi sù la storia
Dal Maggiolin ca l'è staa lu a pensaghi,
Dopu vè sborsa lu i danèe par fà
La piassa granda anca in do gh'eva i cà
                                   Cuntaghi sù ca l'è staa 'l Piermarini
                                   Ca l'ha sgrandii la gesa e faa ' l disegn
                                   Da la facciada, amis dal Maggiolini,
                                   Che a Milan l'eva faa i bei soeur da legn,
                                   Ebanista Imperiale, lu e 'l sò fioeu,
                                   Sarant a dì da Cà Real incoeu.
E tirà a man la rongia, in gir in gir
Ai platan, San Michè cont'ol portiù;
Ragordass che d'astaa nun, tutti i sir,
Cont i soquar in man, pena giò 'l su.
Correvum a lavass, e poeu, bel bel,
Strusevum fina a cà i nostar tappell
                                    La vigneva, la rongia, da L'Urona
                                    E l'andeva in di frà; l'eva un derittu,
                                    Che la Regina Teodolinda, bona,
                                    A l'eva conceduu cont on so scrittu:
                                    Acqua e terr e giarditi sempr'assè.
                                    Poeu a la vasca di pess dal Monastè.
Quii tempi là, ch'evan nò tanti i pussi,
L'eva on bell comand par i por paisan,
Che, senza laurascià me tanti mussi,
Gh'evan l'acqua di bèsti lì a la man;
Tacheva foeui? Allee,sigi e sidell,
Che pompa pronta e doè curr no al Macell!
                                     Ona voeulta. l'Uffizi da Milan
                                     L'ha mandaa l'ordin da stupall ol rià;
                                     Che rabbia e dispisè par i paisan,
                                     E chissà che bordell en faa anca i frà!
                                     L'ha mittuu 'l postu i robi on bigliattin
                                     Ca 'l ga faa l'Arciduca al Maggiolin.
Che festa l'è staa mai, e che ligria,
Quandu che l'acqua l'è turnaa a curr giò!
Bairr, sapi, sapun, quel che si sia
A l'eva bun par fai la straa ancamò;
Don Gustin Peregall, da contatessa,
L'ha faa sonà i campann, lìha cantaa Messa..
                                      E inscì, tanti e tanti ann, la rongia bella
                                      l'ha sigutaa a curr giò da San Michè;
                                      Glù-glù. glù-glù, tan me ona turturella,
                                      In dal curr la diseva, e , insemma a lè,
                                      Sui platan i scigar, sciuttaa dal su,
                                      Crà-crà, crà-crà, cantevan, no glù-glù.
Avv. Fumagalli (1924)